ការរៀបចំថ្នាលបណ្ដុះកូន

សម្រាប់ការដាំដុះស្រូវ ១ ហិចតា វាគ្រប់គ្រាន់ក្នុងការរៀបចំថ្នាលបណ្តុះកូនមួយ ដែលមានទំហំ (ទទឹង ១ ម x ប្រវែង ៤៦.៥ម x កម្ពស់ ០.១ម)។

ដាក់បន្ថែមនូវសារធាតុសរីរាង្គ រុក្ខជាតិរលួយ លាមកគោរលួយ និងធ្យូងអង្កាមឱ្យបានច្រើនតាមដែលអាចធ្វើទៅបាន។

ក្នុងថ្នាលបណ្តុះកូនមួយ ត្រូវដាក់ជី TSP ១២,៧៦ គីឡូក្រាម និង ប៉ូតាស់ ៦, ៣១ គីឡូ ជាជីទ្រាប់បាត។

ដើម្បីបងា្ករការបំផ្លាញថ្នាលបណ្តុះដោយសារការបាក់ដី ធ្វើរណ្តៅបង្ហូរទឹកនៅចន្លោះរង ធ្វើដូច្នេះទឹកដែលបានស្រោចស្រព និងការបង្ហូរទឹកត្រូវបានដំណើរការបានរលូន។

បាចគ្រាប់ពូជដែលមានដំណុះស្មើៗគ្នានៅលើថ្នាលបណ្តុះកូន។ ពីរភាគបីនៃគ្រាប់ពូជដំបូងគឺត្រូវបាចស្តើងៗលើថ្នាលជាមុនសិន ហើយបាចគ្រាប់ពូជដែលនៅសល់ទៅលើកន្លែងដែលមានចន្លោះ។ ប្រើ ១ ពែង (ពែងទឹកដោះគោខាប់ទទេ) នៃគ្រាប់ពូជដើម្បីបាចលើផ្ទៃដី ១ ម៉ែត្រការ៉េ។

គ្របដណ្ដប់ដោយធ្យូងអង្កាម/ផេះពីលើគ្រាប់ពូជ ដើម្បីជៀសវាងការផ្លាស់ទីលំនៅ និងការបាត់បង់គ្រាប់ពូជដោយសារទឹកភ្លៀង និងសត្វស្លាប។ (ត្រូវ​ប្រាកដ​ថា​ធ្យូង​អង្កាម​មិន​លាយ​ជាមួយ​គ្រាប់​ស្រូវ​ផ្សេង​ទៀត​)